माध्यमिक शिक्षा परीक्षा (एसइई)मा नक्कली परीक्षार्थी बनेर परीक्षा दिन गएको आरोपमा एक युवकलाई प्रहरीले पक्राउ गरेको छ।

मकवानपुर प्रहरीले १८ वर्षीय बिराज विकलाई पक्राउ गरेको जानकारी दिएको हो। उनी अर्कै व्यक्तिको प्रवेशपत्रमा आफ्नो फोटो टाँसेर परीक्षा दिन पुगेका थिए।

प्रहरीका अनुसार हेटौँडा उपमहानगरपालिका–१० स्थित सोलिड्यारेटी माध्यमिक विद्यालय परीक्षा केन्द्रमा परीक्षा दिइरहेका बेला विकलाई नियन्त्रणमा लिइएको हो।

सिन्धुली मरिन गाउँपालिका–४ घर भई हाल हेटौँडा–४ बस्दै आएका विकले हेटौँडा–१२ पदमपोखरीका १९ वर्षीय अंकिश श्रेष्ठको प्रवेशपत्र प्रयोग गरेका थिए। सोही प्रवेशपत्रमा आफ्नो फोटो टाँसेर उनी परीक्षा दिन गएका थिए।

सूचना प्राप्त भएपछि प्रहरीले विकलाई पक्राउ गरेको जनाएको छ। साथै, प्रवेशपत्र उपलब्ध गराउने अंकिश श्रेष्ठलाई पनि नियन्त्रणमा लिइएको छ।

दुवै जनामाथि थप अनुसन्धान भइरहेको मकवानपुर प्रहरीले जनाएको छ।